ਸਾਈਕਲ ਥੈਰੇਪੀ: ਰੋਜ਼ਾਨਾ ਸਾਈਕਲ ਚਲਾਉਣ ਨਾਲ ਬੁਢਾਪਾ ਰਹੇਗਾ ਦੂਰ, ਯਾਦਾਸ਼ਤ ਤੇ ਇਮਿਊਨਿਟੀ ਨੂੰ ਮਿਲੇਗਾ ਵੱਡਾ ਫਾਇਦਾ

ਨਵੀਂ ਦਿੱਲੀ: ਵਧਦੀ ਉਮਰ ਦੇ ਨਾਲ ਮਾਸਪੇਸ਼ੀਆਂ ਦਾ ਕਮਜ਼ੋਰ ਹੋਣਾ ਅਤੇ ਜੋੜਾਂ ਦਾ ਜਾਮ ਹੋਣਾ ਇੱਕ ਆਮ ਸਮੱਸਿਆ ਹੈ। ਪਰ ਹਾਲ ਹੀ ਵਿੱਚ ਹੋਈ ਇੱਕ ਖੋਜ ਨੇ ਸਿਹਤਮੰਦ ਜ਼ਿੰਦਗੀ ਜਿਊਣ ਦਾ ਇੱਕ ਬਹੁਤ ਹੀ ਸਸਤਾ ਅਤੇ ਵਿਗਿਆਨਕ ਤਰੀਕਾ ਸਾਹਮਣੇ ਲਿਆਂਦਾ ਹੈ। ਏਮਜ਼ (AIIMS) ਦਿੱਲੀ ਦੇ ਰੂਮੇਟੋਲੋਜੀ ਵਿਭਾਗ ਦੀ ਐੱਚ.ਓ.ਡੀ. ਡਾ. ਉਮਾ ਕੁਮਾਰ ਅਨੁਸਾਰ, ਰੋਜ਼ਾਨਾ ਸਾਈਕਲ ਚਲਾਉਣ ਨਾਲ ਜ਼ਿੰਦਗੀ ਨੂੰ ਲੰਬੇ ਸਮੇਂ ਤੱਕ ਜਵਾਨ ਰੱਖਿਆ ਜਾ ਸਕਦਾ ਹੈ।

ਯੂਨੀਵਰਸਿਟੀ ਆਫ਼ ਬਰਮਿੰਘਮ ਅਤੇ ਕਿੰਗਜ਼ ਕਾਲਜ ਲੰਡਨ ਦੀ ਇੱਕ ਰਿਸਰਚ ਵਿੱਚ ਇਹ ਪਾਇਆ ਗਿਆ ਹੈ ਕਿ ਜੋ ਬਜ਼ੁਰਗ ਰੋਜ਼ਾਨਾ 20 ਤੋਂ 30 ਮਿੰਟ ਨਿਯਮਿਤ ਰੂਪ ਵਿੱਚ ਸਾਈਕਲ ਚਲਾਉਂਦੇ ਹਨ, ਉਨ੍ਹਾਂ ਦਾ ਇਮਿਊਨ ਸਿਸਟਮ (ਰੋਗਾਂ ਨਾਲ ਲੜਨ ਦੀ ਸ਼ਕਤੀ) ਅਤੇ ਮਾਸਪੇਸ਼ੀਆਂ 20 ਸਾਲ ਦੇ ਨੌਜਵਾਨਾਂ ਵਾਂਗ ਮਜ਼ਬੂਤ ਪਾਈਆਂ ਗਈਆਂ। ਹਾਲਾਂਕਿ, ਜੇਕਰ ਕੋਈ ਵਿਅਕਤੀ ਪਹਿਲਾਂ ਹੀ ਕਿਸੇ ਗੰਭੀਰ ਬੀਮਾਰੀ ਤੋਂ ਪੀੜਤ ਹੈ, ਤਾਂ ਉਸ ਨੂੰ ਡਾਕਟਰ ਦੀ ਸਲਾਹ ਲੈ ਕੇ ਹੀ ਸਾਈਕਲ ਚਲਾਉਣਾ ਚਾਹੀਦਾ ਹੈ।

ਨਿਯਮਿਤ ਸਾਈਕਲ ਚਲਾਉਣ ਦੇ 3 ਵੱਡੇ ਫਾਇਦੇ:

1. ਗੋਡੇ ਰਹਿਣਗੇ ਮਜ਼ਬੂਤ: ਸਾਈਕਲ ਦੇ ਪੈਡਲ ਮਾਰਨ ਨਾਲ ਜੋੜਾਂ ਦੇ ਵਿਚਕਾਰ 'ਸਾਈਨੋਵੀਅਲ ਫਲੂਇਡ' (Synovial Fluid) ਯਾਨੀ ਕਿ ਕੁਦਰਤੀ ਗਰੀਸ ਦਾ ਰਿਸਾਅ ਵਧਦਾ ਹੈ, ਜੋ ਗੋਡਿਆਂ ਦੀ ਸਿਹਤ ਲਈ ਬਹੁਤ ਫਾਇਦੇਮੰਦ ਹੁੰਦਾ ਹੈ।

2. ਯਾਦਾਸ਼ਤ ਵਧੇਗੀ: 'ਪ੍ਰੋਸੀਡਿੰਗਜ਼ ਆਫ਼ ਨੈਸ਼ਨਲ ਅਕੈਡਮੀ ਆਫ਼ ਸਾਇੰਸ' ਵਿੱਚ ਛਪੀ ਇੱਕ ਖੋਜ ਮੁਤਾਬਕ, ਭੁੱਲਣ ਦੀ ਬੀਮਾਰੀ ਨਾਲ ਜੂਝ ਰਹੇ ਬਜ਼ੁਰਗਾਂ ਲਈ ਸਾਈਕਲ ਚਲਾਉਣਾ ਦਿਮਾਗ ਦੇ ਟੌਨਿਕ ਵਜੋਂ ਕੰਮ ਕਰਦਾ ਹੈ।

3. ਦਿਲ ਅਤੇ ਫੇਫੜੇ ਰਹਿਣਗੇ ਤੰਦਰੁਸਤ: ਸਾਈਕਲਿੰਗ ਵਰਗੀ ਐਰੋਬਿਕ ਕਸਰਤ ਮੈਟਾਬੋਲਿਜ਼ਮ ਨੂੰ ਸੁਧਾਰਦੀ ਹੈ ਅਤੇ ਸਰੀਰ ਦੀ ਸੋਜਸ਼ (inflammation) ਨੂੰ ਘੱਟ ਕਰਦੀ ਹੈ। ਇਹ ਦਿਲ ਦੇ ਰੋਗਾਂ ਅਤੇ ਸ਼ੂਗਰ (डायबिटीज) ਦੇ ਖ਼ਤਰੇ ਨੂੰ ਵੀ ਕਾਫ਼ੀ ਹੱਦ ਤੱਕ ਘਟਾਉਂਦੀ ਹੈ।

ਬਜ਼ੁਰਗਾਂ ਦੀ ਸੁਰੱਖਿਆ ਲਈ 2 ਮਹੱਤਵਪੂਰਨ ਨਿਯਮ:

    ਸਾਈਕਲ ਸੈੱਟਅੱਪ: ਸਾਈਕਲ ਦੀ ਸੀਟ ਦਾ ਲੈਵਲ ਇਸ ਤਰ੍ਹਾਂ ਰੱਖੋ ਕਿ ਪੈਡਲ ਹੇਠਾਂ ਹੋਣ 'ਤੇ ਵੀ ਪੈਰ ਹਲਕਾ ਜਿਹਾ ਮੁੜਿਆ ਰਹੇ। ਇਸ ਨਾਲ ਰੀੜ੍ਹ ਦੀ ਹੱਡੀ (Spine) 'ਤੇ ਬੇਲੋੜਾ ਦਬਾਅ ਨਹੀਂ ਪੈਂਦਾ।

    ਇਨਡੋਰ ਵਿਕਲਪ: ਜੇਕਰ ਬਾਹਰ ਤੇਜ਼ ਧੁੱਪ ਹੋਵੇ ਜਾਂ ਟ੍ਰੈਫਿਕ ਜ਼ਿਆਦਾ ਹੋਵੇ, ਤਾਂ ਘਰ ਦੇ ਅੰਦਰ 'ਸਟੇਸ਼ਨਰੀ' ਜਾਂ 'ਮੈਗਨੈਟਿਕ ਐਕਸਰਸਾਈਜ਼ ਸਾਈਕਲ' ਚਲਾਉਣਾ ਸਭ ਤੋਂ ਸੁਰੱਖਿਅਤ ਅਤੇ ਵਧੀਆ ਵਿਕਲਪ ਹੈ।