ਨਵੀਂ ਦਿੱਲੀ : ਸਰੀਰ ਨੂੰ ਤੰਦਰੁਸਤ ਰੱਖਣ ਲਈ ਪ੍ਰੋਟੀਨ ਸਭ ਤੋਂ ਜ਼ਰੂਰੀ ਤੱਤਾਂ ਵਿੱਚੋਂ ਇੱਕ ਹੈ ਅਤੇ ਜਦੋਂ ਪ੍ਰੋਟੀਨ ਦੇ ਸਭ ਤੋਂ ਵਧੀਆ ਸਰੋਤ ਦੀ ਗੱਲ ਆਉਂਦੀ ਹੈ, ਤਾਂ ‘ਅੰਡੇ’ (Eggs) ਦਾ ਨਾਮ ਸਭ ਤੋਂ ਪਹਿਲਾਂ ਆਉਂਦਾ ਹੈ। ਪਰ ਕੀ ਤੁਸੀਂ ਕਦੇ ਸੋਚਿਆ ਹੈ ਕਿ ਜੇਕਰ ਤੁਸੀਂ ਲਗਾਤਾਰ 14 ਦਿਨ (ਦੋ ਹਫ਼ਤੇ) ਰੋਜ਼ਾਨਾ ਅੰਡੇ ਖਾਂਦੇ ਹੋ, ਤਾਂ ਤੁਹਾਡੇ ਸਰੀਰ ਦੇ ਅੰਦਰ ਕੀ ਪ੍ਰਤੀਕਿਰਿਆ ਹੁੰਦੀ ਹੈ?
ਇਸ ਸਵਾਲ ਦਾ ਜਵਾਬ ਦਿੱਤਾ ਹੈ ਮਸ਼ਹੂਰ ਗੈਸਟ੍ਰੋਐਂਟਰੌਲੋਜਿਸਟ (ਪੇਟ ਦੇ ਰੋਗਾਂ ਦੇ ਮਾਹਿਰ) ਡਾ. ਸੇਠੀ ਨੇ। ਡਾ. ਸੇਠੀ ਨੇ ਏਮਜ਼ (AIIMS), ਹਾਰਵਰਡ ਅਤੇ ਸਟੈਨਫੋਰਡ ਯੂਨੀਵਰਸਿਟੀ ਵਰਗੀਆਂ ਵੱਕਾਰੀ ਸੰਸਥਾਵਾਂ ਤੋਂ ਸਿਖਲਾਈ ਪ੍ਰਾਪਤ ਕੀਤੀ ਹੈ। ਉਨ੍ਹਾਂ ਨੇ ਹਾਲ ਹੀ ਵਿੱਚ ਆਪਣੇ ਇੰਸਟਾਗ੍ਰਾਮ ਅਕਾਊਂਟ ‘ਤੇ ਇੱਕ ਵੀਡੀਓ ਸਾਂਝੀ ਕਰਕੇ ਦੱਸਿਆ ਕਿ ਅੰਡੇ ਸਿਰਫ਼ ਨਾਸ਼ਤੇ ਦਾ ਹਿੱਸਾ ਨਹੀਂ, ਸਗੋਂ ਸਰੀਰ ਲਈ ਇੱਕ ‘ਸੁਪਰਫੂਡ’ ਵਜੋਂ ਕੰਮ ਕਰਦੇ ਹਨ।
ਆਓ ਜਾਣਦੇ ਹਾਂ ਡਾ. ਸੇਠੀ ਮੁਤਾਬਕ ਲਗਾਤਾਰ ਅੰਡੇ ਖਾਣ ਨਾਲ ਸਰੀਰ ਵਿੱਚ ਆਉਣ ਵਾਲੇ 4 ਵੱਡੇ ਬਦਲਾਅ:
- ਪੋਸ਼ਕ ਤੱਤਾਂ ਦਾ ਪਾਵਰਹਾਊਸ: ਡਾ. ਸੇਠੀ ਨੇ ਦੱਸਿਆ ਕਿ ਅੰਡਾ ਇੱਕ ਮੁਕੰਮਲ ਖੁਰਾਕ ਹੈ। ਬਹੁਤ ਸਾਰੇ ਲੋਕ ਅੰਡੇ ਦਾ ਪੀਲਾ ਭਾਗ ਛੱਡ ਦਿੰਦੇ ਹਨ, ਪਰ ਡਾਕਟਰ ਮੁਤਾਬਕ ਅੰਡੇ ਦੇ ਪੀਲੇ ਭਾਗ (Yolk) ਵਿੱਚ ਲਗਭਗ 2.5 ਗ੍ਰਾਮ ਪ੍ਰੋਟੀਨ ਹੁੰਦਾ ਹੈ, ਜਦੋਂ ਕਿ ਚਿੱਟੇ ਭਾਗ ਵਿੱਚ 4 ਗ੍ਰਾਮ ਪ੍ਰੋਟੀਨ ਹੁੰਦਾ ਹੈ। ਇਸ ਤਰ੍ਹਾਂ, ਪੂਰਾ ਅੰਡਾ ਖਾਣ ਨਾਲ ਸਰੀਰ ਨੂੰ ‘ਹਾਈ ਕੁਆਲਿਟੀ ਪ੍ਰੋਟੀਨ’ ਮਿਲਦਾ ਹੈ, ਜੋ ਮਾਸਪੇਸ਼ੀਆਂ ਅਤੇ ਸਰੀਰ ਦੇ ਵਿਕਾਸ ਲਈ ਬੇਹੱਦ ਜ਼ਰੂਰੀ ਹੈ।
- ਅੱਖਾਂ ਦੀ ਰੋਸ਼ਨੀ ਲਈ ਸੁਰੱਖਿਆ ਕਵਚ :ਉਮਰ ਵਧਣ ਦੇ ਨਾਲ ਅੱਖਾਂ ਦੀ ਰੋਸ਼ਨੀ ਘਟਣਾ ਆਮ ਗੱਲ ਹੈ, ਪਰ ਅੰਡੇ ਇਸ ਪ੍ਰਕਿਰਿਆ ਨੂੰ ਧੀਮਾ ਕਰ ਸਕਦੇ ਹਨ। ਡਾ. ਸੇਠੀ ਅਨੁਸਾਰ, ਅੰਡਿਆਂ ਵਿੱਚ ਲਿਊਟਿਨ (Lutein) ਅਤੇ ਜ਼ੀਐਕਸੈਂਥਿਨ (Zeaxanthin) ਵਰਗੇ ਸ਼ਕਤੀਸ਼ਾਲੀ ਐਂਟੀਆਕਸੀਡੈਂਟ ਹੁੰਦੇ ਹਨ। ਇਹ ਤੱਤ ਅੱਖਾਂ ਨੂੰ ‘ਮੈਕੁਲਰ ਡੀਜਨਰੇਸ਼ਨ’ ਅਤੇ ਮੋਤੀਆਬਿੰਦ (Cataracts) ਵਰਗੀਆਂ ਬਿਮਾਰੀਆਂ ਤੋਂ ਬਚਾਉਂਦੇ ਹਨ ਅਤੇ ਅੱਖਾਂ ਦੇ ਲੈਂਜ਼ ਨੂੰ ਸਿਹਤਮੰਦ ਰੱਖਦੇ ਹਨ।
- ਦਿਮਾਗ ਅਤੇ ਲਿਵਰ ਲਈ ਵਰਦਾਨ: ਅੱਜਕਲ੍ਹ ਦੀ ਖਰਾਬ ਜੀਵਨ ਸ਼ੈਲੀ ਕਾਰਨ ‘ਫੈਟੀ ਲਿਵਰ’ ਦੀ ਸਮੱਸਿਆ ਤੇਜ਼ੀ ਨਾਲ ਵਧ ਰਹੀ ਹੈ। ਰਿਪੋਰਟਾਂ ਮੁਤਾਬਕ ਹਰ ਤੀਜਾ ਭਾਰਤੀ ਇਸ ਸਮੱਸਿਆ ਤੋਂ ਪੀੜਤ ਹੋ ਸਕਦਾ ਹੈ। ਡਾ. ਸੇਠੀ ਨੇ ਦੱਸਿਆ ਕਿ ਅੰਡਿਆਂ ਵਿੱਚ ‘ਕੋਲੀਨ’ (Choline) ਨਾਮਕ ਇੱਕ ਖਾਸ ਤੱਤ ਭਰਪੂਰ ਮਾਤਰਾ ਵਿੱਚ ਪਾਇਆ ਜਾਂਦਾ ਹੈ। ਇਹ ਤੱਤ ਨਾ ਸਿਰਫ਼ ਦਿਮਾਗ ਦੀ ਕਾਰਜਸ਼ਕਤੀ ਨੂੰ ਵਧਾਉਂਦਾ ਹੈ ਬਲਕਿ ਲਿਵਰ ਨੂੰ ਸਾਫ਼ ਰੱਖਣ ਅਤੇ ਫੈਟੀ ਲਿਵਰ ਵਰਗੀਆਂ ਬਿਮਾਰੀਆਂ ਨੂੰ ਰੋਕਣ ਵਿੱਚ ਅਹਿਮ ਭੂਮਿਕਾ ਨਿਭਾਉਂਦਾ ਹੈ।
- ਕੋਲੈਸਟ੍ਰੋਲ ਅਤੇ ਬਲੱਡ ਸ਼ੂਗਰ: ਰਹਿੰਦੀ ਹੈ ਕੰਟਰੋਲ ਅਕਸਰ ਲੋਕ ਇਹ ਸੋਚ ਕੇ ਅੰਡੇ ਖਾਣ ਤੋਂ ਡਰਦੇ ਹਨ ਕਿ ਇਸ ਨਾਲ ਕੋਲੈਸਟ੍ਰੋਲ ਵਧ ਜਾਵੇਗਾ। ਇਸ ਭੁਲੇਖੇ ਨੂੰ ਦੂਰ ਕਰਦਿਆਂ ਡਾ. ਸੇਠੀ ਨੇ ਸਪੱਸ਼ਟ ਕੀਤਾ ਕਿ ਅੰਡੇ ਖਾਣ ਨਾਲ ਸਰੀਰ ਵਿੱਚ ‘ਗੁੱਡ ਕੋਲੈਸਟ੍ਰੋਲ’ (HDL) ਦਾ ਪੱਧਰ ਵਧਦਾ ਹੈ, ਜੋ ਕਿ ਦਿਲ ਦੀ ਸਿਹਤ ਲਈ ਚੰਗਾ ਹੁੰਦਾ ਹੈ। ਇਸ ਤੋਂ ਇਲਾਵਾ, ਨਾਸ਼ਤੇ ਵਿੱਚ ਅੰਡੇ ਖਾਣ ਨਾਲ ਬਲੱਡ ਸ਼ੂਗਰ (Blood Sugar) ਦਾ ਪੱਧਰ ਸਥਿਰ ਰਹਿੰਦਾ ਹੈ, ਜਿਸ ਨਾਲ ਤੁਹਾਨੂੰ ਜਲਦੀ ਭੁੱਖ ਨਹੀਂ ਲੱਗਦੀ ਅਤੇ ਤੁਸੀਂ ਸਾਰਾ ਦਿਨ ਊਰਜਾਵਾਨ ਮਹਿਸੂਸ ਕਰਦੇ ਹੋ।
ਸ਼ਾਕਾਹਾਰੀ ਲੋਕ ਕੀ ਕਰਨ? ਜੋ ਲੋਕ ਸ਼ੁੱਧ ਸ਼ਾਕਾਹਾਰੀ ਹਨ ਅਤੇ ਅੰਡੇ ਨਹੀਂ ਖਾ ਸਕਦੇ, ਉਨ੍ਹਾਂ ਨੂੰ ਨਿਰਾਸ਼ ਹੋਣ ਦੀ ਲੋੜ ਨਹੀਂ ਹੈ। ਡਾ. ਸੇਠੀ ਨੇ ਉਨ੍ਹਾਂ ਲਈ ਟੋਫੂ (Tofu) ਨੂੰ ਇੱਕ ਬਿਹਤਰੀਨ ਵਿਕਲਪ ਦੱਸਿਆ ਹੈ। ਟੋਫੂ ਵਿੱਚ ਵੀ ਚੰਗੀ ਮਾਤਰਾ ਵਿੱਚ ਪ੍ਰੋਟੀਨ ਅਤੇ ਜ਼ਰੂਰੀ ਪੋਸ਼ਕ ਤੱਤ ਪਾਏ ਜਾਂਦੇ ਹਨ।
(ਬੇਦਾਅਵਾ: ਇਹ ਖ਼ਬਰ ਸਿਰਫ਼ ਆਮ ਜਾਣਕਾਰੀ ਲਈ ਹੈ। ਜੇਕਰ ਤੁਹਾਨੂੰ ਕੋਈ ਗੰਭੀਰ ਬਿਮਾਰੀ ਹੈ ਜਾਂ ਤੁਸੀਂ ਆਪਣੀ ਖੁਰਾਕ ਵਿੱਚ ਕੋਈ ਵੱਡਾ ਬਦਲਾਅ ਕਰਨ ਜਾ ਰਹੇ ਹੋ, ਤਾਂ ਪਹਿਲਾਂ ਆਪਣੇ ਡਾਕਟਰ ਜਾਂ ਡਾਇਟੀਸ਼ੀਅਨ ਦੀ ਸਲਾਹ ਜ਼ਰੂਰ ਲਓ।)