ਬਰਨਾਲਾ :ਅੱਜ ਦੇ ਦੌਰ ਵਿੱਚ ਜਿੱਥੇ ਪੰਜਾਬ ਦੀ ਜਵਾਨੀ ਰੁਜ਼ਗਾਰ ਦੀ ਭਾਲ ਵਿੱਚ ਵਿਦੇਸ਼ਾਂ ਵੱਲ ਦੌੜ ਰਹੀ ਹੈ, ਉੱਥੇ ਹੀ ਕੁਝ ਅਜਿਹੇ ਇਨਸਾਨ ਵੀ ਹਨ ਜੋ ਵਧਦੇ ਪ੍ਰਦੂਸ਼ਣ ਅਤੇ ਬਿਮਾਰੀਆਂ ਤੋਂ ਚਿੰਤਤ ਹੋ ਕੇ ਵਾਪਸ ਆਪਣੀ ਮਿੱਟੀ ਨਾਲ ਜੁੜ ਰਹੇ ਹਨ। ਬਰਨਾਲਾ ਦੇ ਪਿੰਡ ਵਾਹਿਗੁਰੂਪੁਰਾ ਨੈਚਰੁਲ ਫਾਰਮ ਵਿਖੇ ਪੰਜ ਦਿਨਾਂ ਦੀ ਕੁਦਰਤੀ ਖੇਤੀ ਟ੍ਰੇਨਿੰਗ ਨੇ ਸਿੱਧ ਕਰ ਦਿੱਤਾ ਹੈ ਕਿ ਹੁਣ ਲੋਕਾਂ ਦਾ ਰੁਝਾਨ ਮੁਨਾਫ਼ੇ ਵਾਲੀ ਖੇਤੀ ਤੋਂ ਵਧ ਕੇ ‘ਸਿਹਤਮੰਦ ਜੀਵਨ’ ਵੱਲ ਹੋ ਰਿਹਾ ਹੈ।
ਵੱਡੀਆਂ ਨੌਕਰੀਆਂ ਅਤੇ ਵਿਦੇਸ਼ੀ ਸੁੱਖ-ਸਹੂਲਤਾਂ ਨੂੰ ਮਾਰੀ ਲੱਤ
ਇਸ ਟ੍ਰੇਨਿੰਗ ਕੈਂਪ ਵਿੱਚ ਹਿੱਸਾ ਲੈਣ ਵਾਲੇ ਸਿਖਿਆਰਥੀਆਂ ਦੀਆਂ ਕਹਾਣੀਆਂ ਪ੍ਰੇਰਨਾਦਾਇਕ ਹਨ।
- ਰਾਜਵਿੰਦਰ ਸਿੰਘ: ਜੋ ਦੁਬਈ ਵਿੱਚ ਬਤੌਰ ਟਰੱਕ ਡਰਾਈਵਰ ਕੰਮ ਕਰਦੇ ਸਨ, ਹੁਣ ਵਿਦੇਸ਼ੀ ਕਮਾਈ ਛੱਡ ਕੇ ਆਪਣੀ ਧਰਤੀ ‘ਤੇ ਆਰਗੈਨਿਕ ਖੇਤੀ ਨੂੰ ਹੀ ਆਪਣੇ ਜੀਵਨ ਦਾ ਮਕਸਦ ਬਣਾ ਚੁੱਕੇ ਹਨ।
- ਹਰਜਿੰਦਰ ਸਿੰਘ ਸਿੱਧੂ: ਸਟੇਟ ਬੈਂਕ ਆਫ ਇੰਡੀਆ (SBI) ਵਿੱਚ ਚੀਫ ਮੈਨੇਜਰ ਵਰਗੇ ਉੱਚੇ ਅਹੁਦੇ ‘ਤੇ ਤਾਇਨਾਤ ਹੋਣ ਦੇ ਬਾਵਜੂਦ, ਉਨ੍ਹਾਂ ਨੇ ਕੁਦਰਤ ਨਾਲ ਲਗਾਉ ਕਾਰਨ ਸਮੇਂ ਤੋਂ ਪਹਿਲਾਂ (VRS) ਨੌਕਰੀ ਛੱਡ ਦਿੱਤੀ।
- ਸਮਰਦੀਪ ਸਿੰਘ: ਇੱਕ ਨੌਜਵਾਨ ਜਿਸ ਨੇ ਪ੍ਰਾਈਵੇਟ ਬੈਂਕ ਦੀ ਚੰਗੀ-ਭਲੀ ਨੌਕਰੀ ਨੂੰ ਸਿਰਫ਼ ਇਸ ਲਈ ਤਿਆਗ ਦਿੱਤਾ ਤਾਂ ਜੋ ਉਹ ਜ਼ਹਿਰ ਮੁਕਤ ਖੇਤੀ ਕਰ ਸਕੇ।
- ਕਮਲਦੀਪ ਸਿੰਘ: ਪਰਿਵਾਰਕ ਮੈਂਬਰਾਂ ਦੀ ਖ਼ਰਾਬ ਸਿਹਤ ਤੋਂ ਪਰੇਸ਼ਾਨ ਹੋ ਕੇ ਉਨ੍ਹਾਂ ਨੇ ਫੈਸਲਾ ਕੀਤਾ ਕਿ ਖ਼ੁਦ ਸ਼ੁੱਧ ਅਨਾਜ ਅਤੇ ਸਬਜ਼ੀਆਂ ਉਗਾ ਕੇ ਹੀ ਪਰਿਵਾਰ ਨੂੰ ਬਿਮਾਰੀਆਂ ਤੋਂ ਬਚਾਇਆ ਜਾ ਸਕਦਾ ਹੈ।
ਔਰਤਾਂ ਵੀ ਨਹੀਂ ਕਿਸੇ ਨਾਲੋਂ ਘੱਟ
ਇਸ ਮੁਹਿੰਮ ਵਿੱਚ ਸਿਰਫ਼ ਮਰਦ ਹੀ ਨਹੀਂ, ਸਗੋਂ ਔਰਤਾਂ ਵੀ ਮੋਢੇ ਨਾਲ ਮੋਢਾ ਜੋੜ ਕੇ ਚੱਲ ਰਹੀਆਂ ਹਨ। ਹਰਪ੍ਰੀਤ ਕੌਰ, ਜੋ ਕਿਸੇ ਸਮੇਂ ਲੈਕਚਰਾਰ ਵਜੋਂ ਸੇਵਾਵਾਂ ਨਿਭਾ ਰਹੇ ਸਨ, ਪਰ ਨੌਕਰੀ ਛੱਡ ਕੇ ਅੱਜ ਉਹ ਕੁਦਰਤੀ ਖੇਤੀ ਦੇ ਖੇਤਰ ਵਿੱਚ ਆਪਣੀ ਵਿਲੱਖਣ ਪਛਾਣ ਬਣਾ ਰਹੇ ਹਨ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਘਰ ਦੀ ਰਸੋਈ ਨੂੰ ਜ਼ਹਿਰ ਮੁਕਤ ਕਰਨ ਦੀ ਜ਼ਿੰਮੇਵਾਰੀ ਔਰਤਾਂ ਦੀ ਸਭ ਤੋਂ ਵੱਧ ਹੈ। ਕੁਦਰਤੀ ਜਾਂ ਆਰਗੈਨਿਕ ਖੇਤੀ ਦੀ ਸਫਲਤਾ ਵਿੱਚ ਔਰਤਾਂ ਦੀ ਅਹਿਮ ਭੂਮਿਕਾ ਹੁੰਦੀ ਹੈ। ਜੇਕਰ ਇਸ ਖੇਤਰ ਵਿੱਚ ਔਰਤ ਮਰਦ ਦਾ ਸਾਥ ਦੇਵੇ ਤਾਂ ਦਿਨ ਦੁੱਗਣੇ ਤੇ ਰਾਤ ਚੌਗਣੀ ਤਰੱਕੀ ਹੋ ਜਾਵੇਗੀ।
ਦੇਸੀ ਬੀਜਾਂ ਦੀ ਸੰਭਾਲ: ਅੰਨਦਾਨਾ ਸੰਸਥਾ ਦਾ ਯੋਗਦਾਨ
ਇਸ ਪੰਜ ਦਿਨਾਂ ਟ੍ਰੇਨਿੰਗ ਵਿੱਚ ਬੈਂਗਲੌਰ ਤੋਂ ਵਿਸ਼ੇਸ਼ ਤੌਰ ‘ਤੇ ‘ਅੰਨਦਾਨਾ’ ਸੰਸਥਾ ਦੇ ਮੁਖੀ ਸੰਗੀਤਾ ਸ਼ਰਮਾ ਪਹੁੰਚੇ। ਇਹ ਸੰਸਥਾ ਪੂਰੀ ਦੁਨੀਆ ਵਿੱਚ ਲੁਪਤ ਹੋ ਰਹੇ ‘ਦੇਸੀ ਬੀਜਾਂ’ ਨੂੰ ਬਚਾਉਣ ਲਈ ਵੱਡੇ ਪੱਧਰ ‘ਤੇ ਕੰਮ ਕਰ ਰਹੀ ਹੈ। ਉਨ੍ਹਾਂ ਨੇ ਸਿਖਿਆਰਥੀਆਂ ਨੂੰ ਦੱਸਿਆ ਕਿ ਜੇਕਰ ਬੀਜ ਆਪਣਾ ਹੋਵੇਗਾ, ਤਾਂ ਹੀ ਅਸੀਂ ਖੇਤੀ ਦੀ ਲਾਗਤ ਘਟਾ ਸਕਦੇ ਹਾਂ ਅਤੇ ਸ਼ੁੱਧਤਾ ਬਰਕਰਾਰ ਰੱਖ ਸਕਦੇ ਹਾਂ।
“ਸਾਡਾ ਮਕਸਦ ਲੋਕਾਂ ਨੂੰ ਸਿਰਫ਼ ਖੇਤੀ ਸਿਖਾਉਣਾ ਨਹੀਂ, ਸਗੋਂ ਉਨ੍ਹਾਂ ਨੂੰ ਕੁਦਰਤ ਦੇ ਨਿਯਮਾਂ ਨਾਲ ਜੋੜਨਾ ਹੈ।” — ਅੰਮ੍ਰਿਤ ਸਿੰਘ, ਮੁਖੀ ਵਾਹਿਗੁਰੂਪੁਰਾ ਨੈਚੁਰਲ ਫਾਰਮ
ਵਾਹਿਗੁਰੂਪੁਰਾ ਨੈਚੁਰਲ ਫਾਰਮ ਦੇ ਸੰਚਾਲਕ ਅਤੇ ਅਗਾਂਹਵਧੂ ਕਿਸਾਨ ਅੰਮਿਰ ਸਿੰਘ ਵੱਲੋਂ ਲਗਾਇਆ ਗਿਆ ਇਹ ਕੈਂਪ ਪੰਜਾਬ ਦੀ ਖੇਤੀ ਲਈ ਇੱਕ ਨਵੀਂ ਉਮੀਦ ਦੀ ਕਿਰਨ ਹੈ। ਜਦੋਂ ਪੜ੍ਹੇ-ਲਿਖੇ ਅਤੇ ਸਥਾਪਿਤ ਲੋਕ ਖੇਤੀ ਨੂੰ ਕਿੱਤੇ ਵਜੋਂ ਚੁਣਨ ਲੱਗਦੇ ਹਨ, ਤਾਂ ਇਹ ਸਮਾਜ ਵਿੱਚ ਇੱਕ ਵੱਡੀ ਤਬਦੀਲੀ ਦਾ ਸੰਕੇਤ ਹੁੰਦਾ ਹੈ।